له‌ 28/10/2007 له‌ وڵاتی سوێد (Sergelstorg—Stockholm) کۆمیته‌ی هاوکاری هێزه‌ سیاسیيه‌کانی کوردی و کوردستانی و فیدراسیۆنی کۆمه‌ڵه‌ کوردستانیه‌کان و ئینستاتیفی کورد له‌ سوید، دژی هێرشی سه‌ربازی تورکیا بۆ سه‌ر هه‌رێمی کوردستان و گه‌لی کوردستان خۆپیشاندانێکیان  ڕێکخست.

له‌و خۆپیشاندانه‌دا هه‌زاران کوردستانی و دۆستی کورد ئاماده‌ بوون و له‌ جۆش و خرۆشێکی گه‌وره‌دا و به‌ ئاڵای ڕه‌نگینی کوردستانه‌وه‌ و به‌ حه‌ماسێکی زۆره‌وه‌ سروودی نه‌ته‌وایه‌تی و بژی کوردستان و بژی کورد ده‌وترایه‌وه‌ و چه‌ندین په‌رله‌مانتاری سوێدی ئاماده‌بوون و ده‌نگی ناڕه‌زاییان به‌رزده‌کرده‌وه‌ دژی له‌شکرکێشی تورکیا بۆ سه‌ر کوردان ، هونه‌رمه‌ندی نه‌ته‌وه‌ییشمان هونه‌رمه‌ند چۆپییش به‌ڕێکه‌وت له‌و کاته‌دا بۆ کارێکی هونه‌ری له‌ سوێد بوو له‌و خۆپیشاندانه‌دا ئاماده‌بوو و ده‌نگی ناڕه‌زایی خۆی به‌رزکرده‌وه‌ ، وته‌یه‌کی پێشکه‌ش به‌ جه‌ماوه‌ری ئاماده‌بوو کردوو و ووتی:-

به‌خێرهاتنی هه‌موو لایه‌کتان ده‌که‌م، که‌ ده‌زانم هه‌ندێکتان له‌ ڕێگا‌ی دووره‌وه‌ هاتوون و زه‌حمه‌تتان کێشاوه‌ تا گه‌یشتوونه‌ته‌ ئێره‌، ده‌ستانخۆشبێت و ماندوو نه‌بن، منیش ده‌نگی خۆم ده‌خه‌مه‌ پاڵ ده‌نگی ئێوه ‌و به‌ توندی ناڕه‌زایی خۆم ده‌رده‌بڕم به‌رامبه‌ر ئه‌و  له‌شکرکێشییه‌ی تورکیا بۆ سه‌ر هه‌رێمی کوردستان و گه‌لی کورد، هیوادارم کێشه‌کانمان به‌ڕێگه‌ی دیالۆگ و ئاشتییانه‌ چاره‌سه‌ر بکرێت و به‌ بێ خوێنڕشتن کۆتایی به‌ هه‌ڕه‌شه‌کانی تورکیا بێت، بژی کورد بژی کوردستان.

له‌ ناو چه‌پڵه‌ و حه‌ماسی جه‌ماوه‌ردا، هونه‌رمه‌ند چۆپی به‌ مقامێک و به‌سته‌یه‌کی شۆڕشگێڕانه‌ له‌ سه‌نته‌ری ستۆکهۆڵمدا جۆش و خرۆشێکی زۆری دایه‌ خۆپیشانده‌ران.